Heimir Hallgrímsson fyrrum landsliðsþjálfari Íslands skoðar nú sín næstu skrefi í heimi fótboltans gaumgæfilega. Heimir ákvað að láta af störfum hjá Al-Arabi í Katar í upphafi sumars.

Heimir hafði starfað í Katar í tvö og hálft ár og vildi róa á önnur mið. Samkvæmt heimildum 433.is hefur nokkur fjöldi liða haft samband við Heimi og hans umboðsmann eftir að hann lét af störfum í Katar. Er Heimir á blaði hjá mörgum félögum og gæti eitthvað gerst á næstu vikum.

Heimir vann ágætis verk í Katar en ætla má að magnaður árangur hans með íslenska landsliðið sé enn í fersku minni hjá félögum út um allan heim.

Heimir hefur á síðustu vikum og mánuðum verið orðaður við lið í Bandaríkjunum, í Sviss og þá hafa önnur lið í Katar verið nefnd til sögunnar.

Heimir hélt til Katar fyrr í vikunni til að pakka í töskur og ganga frá íbúð sem hann hafði þar í landi, það bendir til þess að Heimir ætli sér ekki að vera áfram í Katar.

Heimir kom íslenska landsliðinu í fyrsta sinn á bæði Evrópumótið og Heimsmeistaramótið. Þrátt fyrir mikinn áhuga ætlar Heimir samkvæmt heimildum að vanda valið þegar hann tekur sitt næsta skref á ferlinum, hann hoppar ekki á hvað sem er.