Kristján Óli Sigurðsson, sérfræðingur í hlaðvarpsþættinum Dr. Football, segir að Freyr Alexandersson sé klár í að taka við karlaliði FH ef starfið losnar.
Freyr starfaði síðast sem aðstoðarmaður Heimis Hallgrímssonar hjá Al Arabi í Katar. Þar áður var hann aðstoðarmaður Erik Hamren hjá íslenska karlalandsliðinu. Hann hefur einnig stýrt kvennalandsliðinu.
Freyr leitar nú að nýju starfi og samkvæmt því sem fram kom í Dr. Football horfir hann á FH sem hugsanlegan áfangastað.
,,Ég heyri að Freyr Alexandersson sé bara á húninum í Krikanum,“ sagði Kristján Óli í nýjasta þættinum.
Hann sagði jafnframt að pressa væri farin að myndast á Loga Ólafssyni, núverandi þjálfara FH. Hafnfirðingar mæta Breiðabliki á útivelli á morgun.
,,Ef að fer illa á Kópavogsvelli á sunnudaginn þá er líklegt að gikkurinn verði hlaðinn,“ sagði Kristján.