Rétt í þessu lauk leik Danmerkur og Belgíu á Evrópumótinu í knattspyrnu. Leiknum lauk með 1-2 sigri Belga.
Danir byrjuðu leikinn af krafti og komust yfir strax þegar 99 sekúndur voru liðnar af leiknum. Þar var Poulsen á ferðinni en hann kláraði með laglegu skoti í fjærhornið eftir undirbúning frá Hojbjerg. Danir héldu uppteknum hætti í fyrri hálfleik og Belgar sáu ekki til sólar og Schmeichel hafði lítið að gera í markinu.
Roberto Martinez var ekki par sáttur með leik sinna manna og gerði breytingu í hálfleik þegar hann setti stórstjörnuna Kevin de Bruyne inná. Hann var ekki lengi að setja mark sitt á leikinn þegar hann átti góða sendingu á Thorgan Hazard sem kláraði í autt markið.
Martinez var með fleiri stórstjörnur á bekknum og setti Eden nokkurn Hazard inná fyrir Yannick Carrasco. Hann var ekki lengi að setja mark sitt á leikinn og gaf stoðsendingu á títtnefndan De Brunye sem kláraði listavel með snyrtilegu vinstri fótarskoti í nærhornið.
Danir gerðu sig líklega undir lokin til þess að jafna en það tókst ekki og 1-2 sigur Belga staðreynd.
Belgar eru þar með á toppi B-riðils með 6 stig en Danir eru á botninum með 0 stig.
Danmörk 1 – 2 Belgía
1-0 Poulsen (´2)
1-1 T. Hazard (´54)
1-2 De Bruyne (´70)