Paul Pogba, leikmaður Manchester United, var í góðum gír eftir að hafa sigrað Þýskaland á EM í gærkvöldi. Hann var þó ekki ánægður með það sem var fyrir framan hann á blaðamannafundinum.
Þar hafði bjórflösku verið stillt upp fyrir framan hann en Heineken er einn af stærstu styrktaraðilum mótsins. Pogba er múslimi og drekkur ekki áfengi. Því fjarlægði hann flöskuna sem stóð fyrir framan hann.
Bjórinn er 0,0 prósent en samt sem áður hafði Pogba engan áhuga á að hafa hann fyrir framan sig. Atvikið minnti mjög á atvik með Cristiano Ronaldo þegar hann fjarlægði tvær kókflöskur af borðinu á blaðamannafundi og sagði fólki að drekka vatn.
Það virðist virka hjá Ronaldo að drekka ekki kók því hann skoraði tvö mörk í 3-0 sigri Portúgala á Ungverjum í gær. Þrátt fyrir að hafa ekki skorað átti Pogba fínan leik á miðjunni hjá frökkum og átti til að mynda frábæra sendingu á Kylian Mbappe sem gaf boltann fyrir og Mats Hummels skoraði sjálfsmark.