Heimir Guðjónsson, þjálfari Vals, vildi lítið tjá sig um Guðmund Andra Tryggvason í viðtali við Fótbolta.net eftir 2-1 tap liðsins gegn Stjörnunni í Pepsi Max-deildinni í gær.
Guðmundur Andri kom til Vals frá Start í upphafi leiktíðar. Kaupverðið er talið hafa verið um 10 milljónir króna. Hann hefur þó aðeins komið við sögu í þremur leikjum til þessa, sem varamaður í þeim öllum.
Heimir var spurður út í stöðu Guðmundar Andra í viðtalinu í gær. Hann var þó pragmatískur í svörum.
„Hann kom inn á í dag og gerði fína hluti. Við byggjum ofan á það. Það verður að sýna þolinmæði í fótboltanum.“
Guðmundur Andri er 21 árs gamall kantmaður sem ólst upp hjá KR, hann gekk í raðir Víkings, á láni frá Start, sumarið 2019 og var frábær í efstu deild.
Guðmundur Andri fór svo aftur til Noregs en tók ekki þátt í deildarleik þar. Hann mætti því aftur til Íslands.