Stjórnarmenn AC Milan eru að hugsa um að gera Simon Kjær að fyrirliða liðsins en hann sýndi mikla leiðtogahæfileika í mjög erfiðum aðstæðum í leik Danmerkur á laugardag.
Eriksen féll niður rétt undir lok fyrri hálfleiks í leik Danmerkur og Finnlands á EM á laugardag. Nú hefur komið í ljós að leikmaðurinn fór í hjartastopp en snögg viðbrögð leikmanna og starfsmanna á vellinum björguðu lífi hans.
Simon Kjær spilaði lykilhlutverk í því að hjálpa Eriksen. Hann var fyrstur til hans og kom í veg fyrir að hann myndi gleypa tunguna og byrjaði hjartahnoð. Þá leiðbeindi hann öðrum leikmönnum að standa vörð um Eriksen ásamt því að hugga eiginkonu hans sem var afar brugðið.
Alessio Romagnoli, fyrirliði AC Milan, er ekki lengur byrjunarliðsmaður hjá félaginu og Gianlugi Donnarumma, varafyrirliði félagsins, er líklega á leið til PSG. Stuðningsmenn vilja ólmir að Kjær fái bandið og nú berast fréttir um að stjórnarmenn AC Milan hafi verið afar hrifnir af leiðtogahæfileikum hans og segir í frétt Sportmediaset að Paolo Maldini, sem er hátt settur í AC Milan, vilji að hann taki við bandinu.