Paul Pogba þarf að hypja sig burt frá Manchester United og spila með einu af betri félögum Evrópu, þetta er skoðun Marcel Desailly samlanda hans.

Desailly átti farsælan feril sem leikmaður en hann er 52 ára í dag og hefur sterka skoðun á því sem Pogba á að gera. Franski miðjumaðurinn gæti farið frá United í sumar þegar aðeins ár verður eftir af samningi hans.

„Hann hefur ekki náð að hámarka hæfileika sína þarna, það er vegna þess að hann vill ekki skuldbinda sig þarna,“ sagði Desailly.

„Ástæðan er líklega sú að það sem er í kringum hann er ekki nógu gott og hugur hans leitar annað.“

Desailly telur sig vita hvað Pogba þurfi. „Hann þarf góða borg, hann þarf gott lið sem spilar með honum. Hann þarf þjálfara sem skilur hann.“

„Didier Deschamps (Þjálfari Frakklands) bjó til kerfi sitt í kringum Pogba á HM 2018. Það þarf allt að vera í lagi svo Pogba blómstri. Hann fær ekki alla hjálpina hjá United og þarf því að fara.“