Sú staðreynd að Rúnar Páll Sigmundsson hafi sagt upp störfum sem þjálfari Stjörnunnar kom leikmönnum félagsins í opna skjöldu. Þetta segja heimildarmenn 433.is. Tíðindin komu leikmönnum í opna skjöldu.
Rúnar sagði mjög óvænt upp starfi fyrr í dag og sendi Stjarnan frá sér tilkynningu þess efnis. Rúnar stýrði liðinu í átta ár.
Leikmenn Stjörnunnar voru steinhissa þegar fréttirnar fóru að berast, Rúnar stýrði æfingu liðsins í gær og virtist allt vera í blóma.
Rúnar tók við Stjörnunni árið 2013 og gerði liðið að Íslandsmeisturum árið 2014 og bikarmeisturum árið 2018. Leikmannahópur Stjörnunnar átti ekki von á uppsögn frá honum eftir einn leik í Íslandsmóti.
Rúnar hefur síðustu tvö ár verið að reyna að fá nýja rödd inn í þjálfarateymið, Ólafur Jóhannesson stýrði liðinu með honum á síðasta ári en sagði upp. Samkvæmt heimildum hafði Ólafi verið lofað að stýra liðinu einn í ár en af því varð ekki, hann sagði því upp.
Stjarnan réð þá Þorvald Örlygsson til að stýra liðinu með Rúnari í ár en eftir jafntefli gegn Leikni í fyrstu umferð sagði Rúnar starfi sínu lausu.