Tottenham tók í gærkvöldi á móti Sheffield United í ensku úrvalsdeildinni. Leiknum lauk með 4-0 sigri Tottenham en leikið var á heimavelli liðsins í Lundúnum.
Gareth Bale kom Tottenham yfir með marki á 36. mínútu eftir stoðsendingu frá Serge Aurier. Bale var síðan aftur á ferðinni er hann tvöfaldaði forystu Tottenham með marki á 61. mínútu.
Átta mínútum síðar, innsiglaði Bale þrennu sína í leiknum með marki eftir stoðsendingu frá Serge Aurier. Það var síðan Heung-Min Son sem tryggði Tottenham 4-0 sigur með marki á 77. mínútu.
Bale virtist skjóta föstum skotum í áttina að José Mourinho, fyrrverandi knattspyrnustjóra Tottenham í viðtali eftir leik. Bale átti erfitt uppdráttar undir stjórn Mourinho en virðist hafa fundið fjölina undir stjórn bráðabirgðastjórans Ryan Mason.
„Við erum meira sóknarsinnaðri, nær marki andstæðingsins og þá skorum við meira,“ sagði Gareth Bale er hann var spurður hvernig það væri að spila eftir leikskipulagi Mason.
Tottenham var gagnrýnt fyrir að vera of varnarsinnað undir stjórn Mourinho, ef liðið komst yfir í leik, var skellt í lás og pakkað í vörn. Bale segir áherslurnar öðruvísi undir stjórn Mason, liðið einblíni meira á sóknarleikinn núna.
„Við höfum verið að vinna í þessu undanfarnar vikur. Þetta eru auðvitað breytingar sem taka tíma en okkur finnst við vera að taka skref í rétta átt. Við erum að spila eins og Tottenham á að spila,“ sagði Gareth Bale, leikmaður Tottenham í viðtali í gærkvöldi.