Enska knattspyrnufélagið Arsenal er til sölu og hefur verið það síðastliðin tvö ár, þrátt fyrir yfirlýsingar eigandans Stan Kroenke um annað, þetta herma heimildir breska fjölmiðilsins Daily Mail.
Mikið hefur verið rætt og ritað undanfarið um að Daniel Ek, eigandi streymisveitunnar Spotify, hyggist leggja fram tilboð um kaup á Arsenal, félagið sem hann hefur stutt síðan í æsku. Daniel segist vera búinn að tryggja fjármagn og hefur tekið höndum saman með fyrrum leikmönnum Arsenal og hyggst eignast félagið.
Það hefur gustað um Stan Kroenke undanfarið eftir að hann, ásamt stjórn Arsenal, ákvað að gerast stofnaðili að Ofurdeildinni sem síðan varð ekki að veruleika. Stuðningsmenn Arsenal eru orðnir langþreyttir á eiganda félagsins.
Heimildir Daily Mail herma að Kroenke hafi fengið tilboð í Arsenal fyrir innan við tveimur árum síðan. Tilboðinu var hafnað en áhugasömum aðilum var tilkynnt að það þyrfti tilboð upp á rúmlega 1.7 milljarð breskra punda ef íhuga ætti sölu á félaginu.