Kórdrengir hafa fengið markvörðinn Lukas Jensen á láni frá enska úrvalsdeildarfélaginu Burnley. Samningurinn gildir til tveggja mánaða.
Þessi 22 ára gamli Dani var síðasta á mála hjá Bolton. Þar var hann einnig á láni en náði þó ekki að brjóta sér leið inn í liðið. Hann hefur einnig spilað með Helsingör og Hellerup IK í heimalandinu.
Sean Dyche, stjóri Burnley, spilaði með Heiðari Helgusyni, aðstoðarþjálfara Kórdrengja á atvinnumannaferli þeirra. Ekki er ólíklegt að það samband hafi hjálpað Kórdrengjum við félagaskiptin.
,,Þetta er gott skref fyrir hann og tækifæri til að spila alvöru leiki,“ sagði markvarðaþjálfari Burnley við heimasíðu félagsins. ,,Það þarf að hrósa honum fyrir það að vilja fara í annað land og spila í sumar því hann hefur ekki séð fjölskyldu sína lengi,“ bætti hann við.
Jensen fer nú í sóttkví á Íslandi áður en hann verður klár í leiki og æfingar með Kórdrengjum.