Frank de Boer þjálfari hollenska landsliðsins vonast til þess að Virgil van Dijk verði í fullu fjöri þegar Evrópumótið byrjar í sumar. De Boer vonast til þess að geta valið hollenska varnarmanninn í hóp sinn.

Van Dijk er langt kominn með endurhæfingu sína en hann sleit krossband í október, síðan þá hefur Van Dijk ekkert spilað með Liverpool.

Ljóst má vera að forráðamenn Liverpool vilja koma í veg fyrir að Van Dijk spili í sumar, eftir svona langa fjarveru vill félagið að Van Dijk komi hægt og rólega til baka.

„Hann verður að taka ákvörðun, þetta er hans ferill,“ sagði De Boer um stöðuna nú mánuði áður en Evrópumótið fer af stað.

De Boer telur að Van Dijk hugi mikið um málið þessa dagana en hann er byrjaður að æfa með bolta. „Ég get ímyndað mér að hann hugsi mikið út í þetta, ég vona að endurhæfingin hansi gangi frábærlega og það gæti verið gott fyrir okkur.“

Ekki er talið líklegt að Van Dijk taki þátt í síðustu fjórum deildarleikjum Liverpool á Englandi.