Óvíst er hvort Heimir Hallgrímsson verði áfram þjálfari Al-Arabi í Katar. Liðið féll úr leik í undanúrslitum í Emir bikarnum í gær og er því tímabilinu formlega lokið í Katar hjá Al-Arabi.
Heimir hefur stýrt Al-Arabi í tvö og hálft ár en aðstoðarmenn hans Freyr Alexandersson og Bjarki Már Ólafsson eru einnig samningslausir.
Eftir tap gegn Al-Sadd í gær sagðist Heimir eiga í samtali við stjórnarmenn Al-Arabi en ákvörðunin væri ekki bara hans um hvort hann yrði þjálfari liðsins.
Aron Einar Gunnarsson fyrirliði liðsins ku vera með klásúlu um að framlengja samning sinn en ekki hafa borist fréttir af því hvort Aron hafi framlengt samning sinn.
Samkvæmt heimildum 433.is hafa Heimir og hans aðstoðarmenn átt í viðræðum við Al-Arabi um nýjan samning en óvíst er hvað kemur úr þeim viðræðum.
