Mohamed Salah, stjörnuleikmaður Liverpool, hefur greint frá því í viðtali við Sky Sports að hann hafi ekkert rætt við félagið um framlengingu á samningi sínum.

Samningur Egyptans rennur út sumarið 2023. Hann hefur margoft verið orðaður í burtu frá félaginu, til dæmis til Barcelona og Real Madrid.

,,Enginn hefur talað við mig svo ég veit ekki,“ sagði Salah sem hefur unnið bæði ensku úrvalsdeildina og Meistaradeildina frá því að hann kom til Liverpool árið 2017.

,,Ég hef sagt það áður að mig langi til þess að vinna úrvalsdeildina og Meistaradeildina aftur. Það er frábært að vinna. Ég er bara að reyna að vinna aftur of aftur, það er partur af vinnu okkar. “ 

Fyrr á árinu sagði Salah að hann væri hundrað prósent viljugur til þess að vera áfram hjá Liverpool. Hann hefur þó áður gefið í skyn að hann hefði áhuga á því að spila á Spáni.

Frá því að Salah kom til Liverpool frá Roma árið 2017 hefur hann verið magnaður, skorað 123 mörk í 198 leikjum.