„Geir Þorsteinsson fyrrum formaður KSÍ, nú framkvæmdarstjóri Skagamanna henti í áhugaverða pillu,“ segir Hjörvar Hafliðason í nýjasta hlaðvarpsþætti Dr. Football sem kom út í dag.

Geir Þorsteinsson benti á það á Twitter í gær að tæp 33 prósent af efstu deild karla yrðu spilað í maí, mótið spilast svo í júní, júlí, ágúst og september ef allt verður eðlilegt. Mótið hefst á föstudag þegar Valur og ÍA eigast við.

Allir hlakka til – Íslandsmót að byrja!
PepsiMax 2021 leikin maí-sept.
7 umferðir af 22 í maí.
7 leikir á 1 mánuði.
Klárast mótið í maí eða þannig?
Leikmenn íslenskra liða hljóta að vera í toppformi!

— Geir Thorsteinsson (@FootballGeir) April 26, 2021

„Allir hlakka til – Íslandsmót að byrja! PepsiMax 2021 leikin maí-sept. 7 umferðir af 22 í maí. 7 leikir á 1 mánuði. Klárast mótið í maí eða þannig? Leikmenn íslenskra liða hljóta að vera í toppformi!,“ skrifar Geir nokkuð ósáttur er virðist á Twitter.

Þannig gæti eitthvað lið stungið af í toppbaráttu deildarinnar strax í maí á meðan eitthvað lið gæti horft á falldrauginn koma yfir sig.

Arnar Sveinn Geirsson forseti Leikmannasamtakanna segir þetta ekki boðlega framkomu við leikmenn. „Ég er alveg sammála honum, bæði fyrir mótið en bara út frá leikmönnum þá er þetta galið. Óþarfa álag, það er hægt að gera þetta öðruvísi. Það er enginn sem segir mér að það þurfi að vera sjö leikir í maí, það er ekki hægt að þjösnast á leikmönnum endalaust,“ sagði Arnar Sveinn.

Arnar Sveinn segir að það þurfi að pæla í leikmönnum. „Á einhverjum tímapunkti þarf að pæla í heilsu leikmanna, ef þeir eru ekki heilir þá spila þeir ekki leiki.“

Hjörvar segir að þessu veðri ekki breytt en efsta deild hefst á föstudag. „1/3 af mótinu klárast í maí, grasvellirnir ekki klárir og veðrið ekki eins og það verður best. Við breytum því ekki núna en þarft innlegg frá Geir.“