Íslenski landsliðsmaðurinn Kolbeinn Sigþórsson hefur sett glæsihús sitt við Haðaland 7 á sölu. Frá þessu er greint á vef Morgunblaðsins.
Þar kemur fram að Kolbeinn hafi keypt húsið árið 2013 á 132 milljónir en í dag húsið auglýst án verðs, það er aðeins tekið við tilboðum.
„Húsið var mikið endurnýjað og byggt við það árið 2007. Þá voru m.a. settir álgluggar í allt húsið og allt gler endurnýjað á sama tíma. Þakdúkur var endurnýjaður og húsið múrað upp á nýtt. Lagðar voru gólfhitalagnir í allt húsið, raflagnir og rafmagnstafla endurnýjuð. Loft voru tekin niður og klædd að hluta og sett innfelld lýsing auk næturlýsingar í einhverja veggi. Skipt var um öll gólfefni í húsinu og bæði gestasnyrting og baðherbergi endurnýjuð með vönduðum Vola tækjum. Eldhús og tæki í eldhúsi voru endurnýjuð árið 2004. Árið 2014 var sett upp stór harðviðarverönd til suðurs útaf stofum með heitum potti,“ segir á vef fasteignasölunnar.
Um er að ræða fasteign í Fossvogi en Eiður Smári Guðjohnsen aðstoðarþjálfari landsliðsins seldi hús sitt í sömu götu á dögunum. Húsið keypti Hörður Björgvin Magnússon landsliðsmaður í knattspyrnu.
Kolbeinn leikur með Gautaborg í Svíþjóð í dag og byrjar vel hjá nýju félagi, hann er markahæsti leikmaður í sögu íslenska landsliðsins ásamt Eiði Smára.
Eignina má sjá hérna á fasteignavef Morgunblaðsins