Hætt var við evrópsku Ofurdeildina eftir vaxandi neikvæða umræðu á þriðjudaginn en gæti ný bresk Ofurdeild verið á leiðinni?
Talið er að nú séu áform um það að breyta ensku úrvalsdeildinni í knattspyrnu. Martin Lipton segir í frétt The Sun að menn séu sammála um að úrvalsdeildin þurfi á yfirhalningu að halda. Þá verði tveimur stærstu liðum Skotlands, Celtic og Rangers, bætt við í ensku deildina.
Celtic og Rangers hafa verið í sérflokki í skosku deildinni í áratugi og þarf að fara aftur til leiktíðarinnar 1984/85 til að finna meistara sem voru ekki Celtic eða Rangers.
Celtic og Rangers hafa gríðarlega stóra stuðningsmannahópa og ættu með þessu meiri möguleika á hærri sjónvarpstekjum og betri auglýsingasamningum. Ásamt þessu myndu skosku klúbbarnir einnig vera góðir fyrir ensku deildina.
Evrópska Ofurdeildin var virkilega óvinsæl og var hætt við hana á aðeins tveimur dögum en talið er að þessi hugmynd gæti fengið samþykki FIFA, UEFA, bresku ríkisstjórnarinnar og stuðningsmanna.
„Öllum finnst kominn tími á breytingar á ensku úrvalsdeildinni. Það er tími til kominn að opna deildina fyrir Rangers og Celtic. Það yrðu allir sáttir við það,“ segir í greininni.