Jesse Lingard, lánsmaður Manchester United hjá West Ham, hefur gengið í gegnum endurnýjun lífdaga hjá síðarnefnda félaginu eftir að hafa vermt bekkinn hjá Manchester United.
Lingard hefur átt þátt í 13 mörkum í 10 leikjum með West Ham og frammistöður hans unnu honum inn sæti í enska landsliðinu á ný.
En Lingard hafði átt mjög erfitt uppdráttar hjá Manchester United áður en hann gekk til liðs við West Ham, hann íhugaði meðal annars að taka sér pásu frá knattspyrnuiðkun.
„Ég hélt inn í leiki með það hugarfar að vera ánægður með að sitja á varamannabekknum. Ég vildi ekki spila og var með hausinn á vitlausum stað, það vantaði allan fókus.“
Lingard hefur notið sín innan vallar hjá West Ham eftir að hann gekk til liðs við liðið á láni í janúar. Hann segir að þegar útgöngubann var sett á í Bretlandi í mars síðastliðnum vegna Covid-19 faraldursins, hafi allt breyst.
„Ég hefði svo auðveldlega geta farið aftur í sama gamla farið, hugsað með sjálfum mér ‘æjj mig langar ekki að gera þetta’ og gefist upp. En baráttukjarkurinn í mér blæs mér alltaf kjark í brjósti.“
„Í útgöngubanninu var ég mikið í ræktinni, hljóp mikið. Ég vildi snúa aftur til æfinga í betra formi og hraðari en allir aðrir, ég gerði það,“ sagði Jesse Lingard í viðtali við Presenting.