Spænskir miðlar halda því fram að Real Madrid hafi endurvakið áhuga sinn á enska landsliðsmanninum Raheem Sterling. Þetta er vegna þess að Sterling er ekki lengur öruggur með byrjunarliðssæti í liði Manchester City eins og það hefur verið síðustu ár.
Í þessum mánuði var Sterling bekkjaður í báðum leikjunum í Meistaradeildinni gegn Dortmund og einnig í ensku úrvalsdeildinni gegn Leicester. Sterling var þó í byrjunarliði Manchester City í undanúrslitum FA bikarsins er liðið tapaði gegn Chelsea.
Sterling á tvö ár eftir á samningi sínum við City en viðræður um framlengingu hafa verið settar á hilluna í bili. Sterling viðurkennir að þetta tímabil hafi verið skrítið fyrir hann:
„Þetta tímabil hefur verið skrítið fyrir mig persónulega. En þrátt fyrir það þá nýt ég þess ennþá að spila fótbolta og gefa liðinu allt sem ég get,“ sagði Sterling við Rio Ferdinand á BT sport.
„Ef ég skora ekki eða hjálpa liðinu á annan hátt er ég ekki sáttur að vera tekinn af velli.“
Ef Sterling verður ennþá í kuldanum hjá Pep þegar líður á þá gæti alveg verið að hann fari að líta í kringum sig og þá er Madrid mögulegur áfangastaður segir í frétt Daily Mail.
