Liverpool tók á móti Aston Villa í öðrum leik dagsins í ensku úrvalsdeildinni. Heimamenn komust í hann krappan en unnu þó að lokum mikilvægan sigur.

Ollie Watkins kom Aston Villa yfir á 43.mínútu leiksins eftir undirbúning frá John McGinn. Stuttu síðar var útlit fyrir að Liverpool hafi jafnað þegar Roberto Firmino kom boltanum í netið. Eftir aðstoð VAR komust dómarar þó að þeirri niðurstöðu að Diogo hafi verið rangstæður í aðdraganda marksins. Tæpt var það þó. Staðan var 0-1 í hálfleik.

Mohamed Salah jafnaði leikinn á 57.mínútu. Hann fylgdi þá eftir skoti sem Emi Martinez, markvörður Villa, hafði varið frá Andy Robertson.

Það stefndi allt í jafntefli á Anfield þar til Trent Alexander-Arnold skoraði sigurmarkið snemma í uppbótartíma. Matty Cash hafði þá reynt að hreinsa boltann burt frá marki en þó beint á Trent sem lék á Douglas Luiz og skoraði.

Lokatölur 2-1 fyrir Liverpool sem er, tímabundið hið minnsta, komið í fjórða sæti deildarinnar. Villa siglir lignan sjó í tíunda sæti.