Algjörlega óvíst er hvort Jóhann Berg Guðmundsson, Gylfi Þór Sigurðsson, Rúnar Alex Rúnarsson og Jón Daði Böðvarsson geti spilað landsleik Íslands og Þýskalands síðar í þessum mánuði.
Allir eiga þeir það sameiginlegt að spila á Englandi, knattspyrnumenn sem fara til Þýskalands frá Englandi þurfa að fara í sóttkví til lengri tíma við komuna aftur til Englands. Allt er þetta vegna COVID-19 veirunnar.
Engar slíkar reglur eru í gangi um leikmenn þegar kemur að landsleikjum í Armeníu og Liechtenstein þar sem liðið spilar svo.
„Staðan er þannig í dag að við vitum ekki einu sinni hvaða leikmenn við getum fengið,“ sagði Arnar Þór Viðarsson landsliðsþjálfari við Morgunblaðið.
Félög eiga rétt á að banna leikmönnum að fara í landsleiki ef þeir þurfa að far í sóttkví við komuna til baka. Reglurnar er varðar Þýskaland gætu breyst í Bretland.
„Það er kórónuveirufaraldur og það eru mismunandi reglur í mismunandi löndum. UEFA og knattspyrnusamböndin náðu mjög vel utan um þetta í síðasta landsleikjaglugga en það hefur ýmislegt breyst síðan þá, eins og til dæmis að Bretland er ekki lengur í Evrópusambandinu. Það er óvissa í kringum það og það er ekki vitað með leikmenn frá Englandi sem dæmi, hvert mega þeir fara og hvað gerist þegar þeir koma til baka. Þetta eru alls ekki aðstæður sem maður myndi óska sér,“ bætti Arnar við.
LJóst er að það væri gríðarleg blóðtaka fyrir íslenska landsliðið að vera án Gylfa og Jóhanns í fyrsta leiknum gegn Þýskalandi.