Rétt í þessu var leik Sheffield United og Liverpool að ljúka. Fyrir leikinn var Liverpool í sjötta sæti deildarinnar með 40 stig en Sheffield á botninum með 11 stig.
Sheffield hafa ekki átt frábært tímabil og var hægt að gera ráð fyrir auðveldum sigri Liverpool í kvöld, þrátt fyrir tap í síðustu fjórum leikjum. Staðan var jöfn í hálfleik og var þessi hálfleikur frekar jafn. Bæði lið fengu nóg af færum en færi Liverpool mun hættulegri og átti Aaron Ramsdale, markvörður Sheffield, margar góðar vörslur.
Liverpool var mun sterkari aðilinn í seinni hálfleik og strax á þriðju mínútu hálfleiksins kom Curtis Jones boltanum í netið eftir fyrirgjöf Trent Alexander-Arnold. Boltinn leit út fyrir að hafa farið út fyrir endamörk þegar Arnold sendi boltann fyrir en við nánari skoðun var boltinn enn inni á vellinum og mark dæmt.
Á 64. mínútu átti Roberto Firmino skot að marki Sheffield sem fór af varnarmanninum Kean Bryan og inn. Markið var skráð sem sjálfsmark og staðan orðin 2-0. Þannig enduðu leikar og Liverpool aftur farnir að vinna leiki eftir erfiðar vikur. Þeir eru þó enn tveim stigum frá Meistaradeildarsæti en að ná því ekki yrði algjör skandall fyrir fráfarandi meistara.