Þremur leikjum er nýlokið í ensku úrvalsdeildinni.
Man Utd 1-0 Crystal Palace
Manchester United tók á móti Crystal Palace í fyrsta leik Ralf Rangnick sem knattspyrnustjóri félagsins.
Gestirnir léku vel á fyrstu mínútum leiksins en svo tók Man Utd yfir. Liðið hefði auðveldlega geta leitt í hálfleik en tókst ekki að nýta tækifærin sín á síðasta þriðjungi vallarins. Því var markalaust í hálfleik.
Alex Telles var nálægt því að koma heimamönnum yfir á 68. mínútu þegar aukaspyrna hans fór í þverslána. Cheikhou Kouyate fékk þá dauðafæri til að koma Palace yfir stuttu síðar en allt kom fyrir ekki.
Sigurmark leiksins kom á 77. mínútu. Þá skoraði Fred með góðu skoti eftir að Mason Greenwood hafði lagt boltann fyrir fætur hans rétt fyrir utan teig. Lokatölur 1-0 fyrir Man Utd.
Man Utd er nú komið upp í sjötta sæti deildarinnar, tímabundið hið minnsta, með 24 stig. Palace er í tólfta sæti með 16 stig.
Tottenham 3-0 Norwich
Norwich mætti til Norður-Lundúna í heimsókn til Tottenham.
Lucas Moura kom heimamönnum yfir á 10. mínútu með flottu marki eftir samleik við Heung-Min Son. Þetta reyndist eina mark fyrri hálfleiks.
Davinson Sanchez tvöfaldaði forystu Tottenham á 67. mínútu með marki sem kom upp úr hornspyrnu.
Tíu mínútum síðar innsiglaði Son 3-0 sigur heimamanna.
Tottenham er komið upp í fimmta sæti deildarinnar með 25 stig. Norwich er á botninum með 10 stig.
Leeds 2-2 Brentford
Leeds tók á móti nýliðum Brentford.
Tyler Roberts skoraði eina mark fyrri hálfleiks fyrir Leeds á 27. mínútu eftir glæsilegan undirbúning Raphinha.
Shandon Baptiste jafnaði fyrir Brenford á 54. mínútu með marki utarlega í teig heimamanna.
Sergi Canos kom gestunum yfir á 61. mínútu með marki eftir sendingu frá Bryan Mbuemo.
Það stefndi allt í sigur nýliða Brentford en á fimmtu mínútu uppbótartíma kom Patrick Bamford boltanum í netið. Stoðsendinguna átti Luke Ayling.
Leeds er í fjórtánda sæti deildarinnar með 16 stig. Brentford er með stigi meira í ellefta sæti.