Heil umferð fór fram í norsku úrvalsdeildinni í dag. Um næstsíðustu umferð var að ræða.
Alfons Sampsted lék allan leikinn með Bodo/Glimt í 2-2 jafntefli gegn Brann. Noregsmeistararnir eru með 3 stiga forskot á toppi deildarinnar fyrir lokaumferðina. Liðið mætir botnliði Mjöndalen þar.
Molde er í öðru sæti. Liðið gerði 3-3 jafntefli við Lilleström í dag. Björn Bergmann Sigurðarson var ekki með Molde vegna meiðsla. Molde þarf að vinna Haugesund í lokaumferðinni og treysta á að Bodo/Glimt tapi gegn Mjöndalen til að verða meistari.
Viking mun hafna í þriðja sæti deildarinnar, síðasta Evrópusætinu. Liðið vann 3-1 sigur á Odd í dag þar sem Samúel Kári Friðjónsson kom inn á sem varamaður og skoraði. Patrik Sigurður Gunnarsson stóð í marki Viking í leiknum.
Hólmar Örn Eyjólfsson lék allan leikinn með Rosenborg í 1-3 sigri á Stabæk. Liðið er í fjórða sæti deildarinnar með 47 stig.
Valarenga vann þá 2-0 sigur á Mjöndalen án Viðars Arnar Kjartanssonar. Valarenga er í sjötta sæti með 45 stig.
Sandefjörd vann 3-2 sigur á Kristiansund í Íslendingaslag. Viðar Ari Jónsson byrjaði fyrir Sandefjörd og skoraði í leiknum. Brynjólfur Andersen kom inn á sem varamaður og lék í um 25 mínútur fyrir Kristiansund. Lið hans er í sjöunda sæti með 43 stig. Sandefjörd er tveimur sætum neðar með 36 stig.
Valdimar Þór Ingimundarson kom inn á sem varamaður á 75. mínútu fyrir Stromsgodset í markalausu jafntefli gegn Haugesund. Ari Leifsson var ekki með liðinu vegna leikbanns. Stromsgodset er í ellefta sæti með 35 stig.
Loks var Adam Örn Arnarson í byrjunarliði Tromsö í 0-1 sigri á Sarpsborg. Tromsö er með 35 stig í tólfta sæti.