Meiðslalistinn hjá enska úrvalsdeildarfélaginu Manchester City er orðinn ansi langur og neyðarástand ríkir hjá félaginu að sögn Pep Guardiola, knattspyrnustjóra liðsins.
City mætir Aston Villa annað kvöld og einungis 14-15 aðalliðsmenn eru leikfærir. Aymeric Laporte er í leikbanni. Ferran Torres, Phil Foden og Jack Grealish eru allir fjarri góðu gamni vegna meiðsla og Kevin de Bruyne hefur ekki mætt til æfinga frá því að hann greindist með Covid-19.
Guardiola hefur áhyggjur af ástandinu, sér í lagi þar sem City þarf að leika níu úrvalsdeildarleiki á næstu sex vikum.
„Það er neyðarástand í leikmannahópnum vegna þess að við höfum mjög, mjög, mjög fáa menn,“ sagði Pep. „Við kvörtum aldrei yfir leikmannaskorti vegna meiðsla eða rauðra spjalda vegna þess að ég hef trú á hópnum og aðrir leikmenn geta komið inn í staðinn.“
„En við erum í miklum vandræðum í desember – erfiðasta mánuð ársins. Við erum bara með 14 eða 15 leikmenn. Og margir þeirra hafa spilað margar mínútur.“
Líklegt þykir að unglingarnir Cole Palmer og James Mcatee verði í hópnum gegn Aston Villa en ljóst er að Guardiola þarf að bíða lengur eftir Foden, Torres, De Bruyne, Laporte og Jack Grealish.