Chelsea og Manchester United gerðu jafntefli í stórleik helgarinnar í ensku úrvalsdeildinni. Leikurinn fór fram á Brúnni. Eiður Smári Guðjohnsen rýndi í leikinn hjá Síminn Sport í gær.
Chelsea var miklu betri aðili leiksins en United nýtti sér mistök í varnarleik Chelsea til að komast yfir.
„Ef þú horfir á tölfræðina þá segir hún sína sögu, United nýtti sér mistök Chelsea,“ sagði Eiður Smári að leik loknum á Vellinum hjá Síminn Sport.
Jorginho jafnaði metinn fyrir Chelsea eftir að hafa gert sig sekan um slæm mistök í marki United. „Hann sýnir mikinn andlegan styrk og slútta vítinu,“ sagði Eiður Smári.
Manchester United stillti upp þremur varnarsinnuðum miðjumönnum í leiknum undir stjórn Michael Carrick. „Þú veist að þegar þú stillir upp þeim þremur þá býstu ekki við listasýningu. Þeir eru góðir að brjóta niður sóknir, mér fannst Matic sterkastur af þeim þremur. Fred mjög duglegur en vantar gæðin.“
Ralf Rangnick er að taka við þjálfun liðsins og vill eflaust breyta einhverju. „Í draumaveröld viltu nota undirbúningstímabil í þetta og þessar færslur, að það sé mjög skýrt þegar leikmaður fer að þú vitir hvað á að gera,“ sagði Eiður.
Jadon Sancho skoraði mark United og hefur nú skorað í tveimur leikjum í röð. „Frábært fyrir hann og United liðið. Það þurfti eitthvað svona til að United myndi skora.“
Ole Gunnar Solskjær var rekinn frá United fyrir rúmri viku en hann og Eiður Smári unnu saman hjá Molde í Noregi þar sem Solskjær var stjóri Eiðs. „Maður spyr sig þegar þú ert með svona stóra karaktera í klefa, hvort hann hafi verið nógu stór. Á þjálfarinn ekki að vera stærstur af þeim öllum? Mjög fær þjálfari, frábærar æfingar og hafa alla góða í klefanum. Það varð honum kannski að falli, hann hafði alltof marga of góða.“
