Antonio Conte, knattspyrnustjóri Tottenham Hotspur, var ekkert að skafa utan af hlutunum eftir að hans menn töpuðu gegn NS Mura í Sambandsdeildinni í kvöld.
Heimamenn í Mura náðu forystunni eftir ellefu mínútna leik þegar Tomi Horvat skoraði glæsilegt mark. Ryan Sessegnon var rekinn af velli á 31. mínútu þegar hann fékk að líta sitt annað gula spjald í leiknum og þar með rautt og Tottenham í slæmri stöðu þegar liðin gengu til búningsherbergja.
Harry Kane jafnaði metin á 72. mínútu eftir sendingu frá Lucas Moura en Amadej Marosa skoraði á lokasekúndunum og sá til þess að slóvenska liðið vann fyrsta leik sinn í Evrópukeppni í níu ára sögu félagsins.
Tottenham er í öðru sæti G-riðils og þarf að vinna topplið Rennes í lokaumferðinni á meðan Vitesse, sem er með sama stigafjölda og Tottenham, á leik gegn Mura.
„Ég ræði yfirleitt ekki við leikmennina strax eftir leik, sérstaklega eftir slæma frammistöðu því það eru enn miklar tilfinningar á lofti. Ég tala við þá á morgun. Þetta var slæmt tap, ég er ekki sáttur við það sem gekk á í leiknum,“ sagði Conte eftir leik.
„Málið er ekki einfalt vegna þess að Tottenham er ekki í háum gæðaflokki eins og staðan er í dag. Það er stórt bil á milli okkar og efstu liðanna á Englandi. Við megum auðvitað ekki vera hræddir. Ég er hérna til að vinna í málunum.
Við þurfum tíma en við þurfum líka að gera allt, allt, allt betur. Við þurfum að sýna metnað, metnaður í fótbolta er mjög mikilvægur fyrir mér,“ sagði Conte að lokum.