Jón Dagur Þorsteinsson, leikmaður íslenska karlalandsliðsins í knattspyrnu segist ekki vera undir smásjá Knattspyrnusambands Íslands í tengslum við gleðskap sem heimildir DV herma að hafi átt sér stað eftir landsleik íslenska karlalandsliðsins gegn Norður-Makedóníu fyrr í mánuðinum. Þetta segir Jón Dagur í samtali við vefsíðuna fotbolti.net.
Tilkynnt var um starfslok Eiðs Smára Guðjohnsen sem aðstoðarlandsliðsþjálfari íslenska karlalandsliðsins í gærkvöldi. Talið er að starfslokin tengist umræddum gleðskap sem á að hafa farið fram eftir leik Íslands og Norður-Makedóníu.
Samkvæmt heimildum DV er einn leikmaður landsliðsins undir smásjá sambandsins en sá er sagður hafa farið hressilega yfir þau mörk sem voru sett þegar Knattspyrnusambandið bauð í glas. Samkvæmt heimildum DV var leikmaðurinn enn í annarlegu ástandi þegar liðið ferðaðist heim á leið snemma morguns þann 15 nóvember.
Mikið hefur verið rætt og ritað um málið á samfélagsmiðlum í dag og hefur nafn Jóns Dags Þorsteinssonar skotið upp kollinum í þeirri umræðu. Hann segist hins vegar ekki vera umræddur leikmaður og vísar ásökunum um slíkt aftur til föðurhúsanna í samtali við fotbolti.net
Ómar Smárason, deildarstjóri samskiptadeildar KSÍ, var með í för með karlalandsliðinu í þessari ferð og segist ekki hafa orðið var við gleðskap. „Menn fengu sér þarna einn tvo bjóra eftir leikinn en annað var það ekki. Flestir fengu sér bara einn til tvö bjóra og fóru svo bara að sofa,“ sagði Ómar í samtali við 433.is fyrr í dag.
Aðspurður að því hvort komið sé að þeim tímapunkti að KSÍ taki fyrir það að áfengi sé haft um hönd í landsliðsverkefnum, segir Ómar að KSÍ hafi ekki áhyggjur af þessum málum.
„Við höfum ekki áhyggjur af áfengi í tengslum við landsliðin almennt. Það er ekki óalgengt að menn setjist niður eftir leikjatörn, sumir fá sér einn eða tvo drykki, aðrir ekki og svo fara menn bara að sofa. Við höfum ekki áhyggjur af þessu almennt.“