Hjörvar Hafliðason sagði frá því í hlaðvarpsþætti sínum, Dr. Football, í kvöld að Viðar Örn Kjartansson gæti skoðað það að koma heim í íslenska boltann.
Þessi 31 árs gamli landsliðsmaður er með samning við Valarenga í Noregi út árið 2023. Hjörvar segir þó að íslenskt félag gæti fengið hann ódýrt.
,,Ég heyrði að Viðar Örn Kjartansson væri mögulega til í að skoða að koma heim,“ sagði Hjörvar í þættinum. ,,Leikmaður sem er 200% að fara að slá markametið ef hann kemur til Íslands.“
Það kom jafnframt fram í þættinum að Viðar væri með einhver tilboð á borðinu erlendis og því ekki víst að hann komi heim á þessum tímapunkti.
Það kom ekki nánar fram hvort eitthvað ákveðið félag hér á landi væri að skoða Viðar. Það er þó ljóst að aðeins eitt af þeim stóru kæmu til greina.
Framherjinn hefur skorað 5 mörk í 18 leikjum í norsku úrvalsdeildinni á þessari leiktíð.