Greint var frá því í dag að flosnað hefði upp úr samningsviðræðum Jesse Lingard og félags hans, Manchester United. West Ham vill fá leikmanninn. Telegraph greinir frá.
Hinn 28 ára gamli Lingard fór á kostum á láni hjá West Ham síðari hluta síðasta tímabils. Hann fór svo aftur til Man Utd í sumar. Tækifærin á þessari leiktíð hafa hins vegar verið af skornum skammti.
Nú er ljóst að leikmaðurinn er á förum frá Man Utd, í hið minnsta næsta sumar.
West Ham vill fá leikmanninn í janúar en þar á bæ eru menn hræddir um að Man Utd muni ekki samþykkja tilboð frá West Ham í ljósi þess að liðin eru í samkeppni um efstu fjögur sætin í ensku úrvalsdeildinni.
West Ham hefur farið frábærlega af stað í deildinni á þessari leiktíð. Liðið er í þriðja sæti með 23 stig eftir ellefu leiki.
Man Utd er í sjötta sæti með 17 stig. Það gæti því farið svo að Man Utd haldi Lingard hjá sér fram á sumar til þess að styrkja ekki samkeppnisaðila í baráttunni um Meistaradeildarsæti.