,,Við bjuggumst við meira. Okkur langaði að keppa um 2.sæti. En eftir allt sem hefur gerst á Íslandi árið 2021 verðum við að viðurkenna það að Norður-Makedónía var næstbest í riðlinum,“ sagði Arnar Þór Viðarsson, landsliðsþjálfari karla, á blaðamannafundi eftir 3-1 tap Íslands gegn Norður-Makedóníu í undankeppni Heimsmeistaramótsins í kvöld.
Undanriðli Íslands er nú lokið og hafnar liðið í fimmta sæti. Norður-Makedónar eru á leið í umspil um sæti í lokakeppni HM 2022 í Katar.
Ezgjan Alioski kom heimamönnum yfir á 7. mínútu í kvöld. Jón Dagur Þorsteinsson jafnaði fyrir Ísland á 55. mínútu. Tíu mínútum síðar komst N-Makedónía aftur yfir með marki frá Eljif Elmas.
Ísak Bergmann Jóhannesson var rekinn af velli með sitt annað gula spjald á 79. mínútu. Heimamenn gegnu á lagið og innsiglaði Elmas 3-1 sigur á 87. mínútu.
Arnar Þór var spurður út í framhaldið hjá íslenska landsliðinu.
,,Það sem tekur við er einfaldlega að halda áfram að greina árið. Við erum búnir að vera að því undanfarnar vikur. Eftir október fórum við í ítarlega greiningarvinnu með gögn og hlaupatölur og vídeó af leikjum. Við munum taka þessa tvo leiki (leikinn í kvöld og gegn Rúmeníu síðasta fimmtudag) og gera upp árið.“
Arnar Þór segist svekktur með að hafa ekki náð öðru sæti riðilsins. Hann gerir sér þó grein fyrir því að liðið hefur átt erfitt uppdráttar á árinu. Kvarnast hefur úr liðinu af ýmsum ástæðum. Til að mynda hafa nokkrir leikmenn verið tengdir við meint kynferðisbrot. Margir ungir leikmenn hafa því þurft að stíga upp.
,,Það eru allir svekktir að hafa ekki getað ráðist á annað sætið í þessum riðli en ég geri mér fulla grein fyrir af hverju það er og ég held að fólk heima geri það líka. Það sem situr mest eftir hjá mér er að ég veit á hvaða stað við erum akkúrat núna og er ótrúlega stoltur af skrefunum sem liðið hefur tekið frá því í lok ágúst.“
,,Leikur eins og í kvöld og gegn Rúmeníu, við munum vera betur til þess fallnir að ná úrslitum í svona leikjum innan skamms.“
,,Ég er fullviss á því að íslenska landsliðið mun verða mjög gott aftur, hvort sem það er eftir tvö, þrjú eða fimm ár,“ sagði Arnar Þór að lokum.
