Jose Mourinho, knattspyrnustjóri Roma, hefur áhuga á að fá Dani Ceballos, fyrrverandi leikmann Arsenal, til félagsins en þetta kemur fram í spænska miðlinum El Nacional.

Ceballos var á láni hjá Arsenal frá Real Madrid undanfarin tvö tímabil en hefur ekki leikið fyrir spænsku risana síðan sem meta miðjumanninn á 20 milljónir evra.

Ceballos hefur aldrei tekist að negla niður sæti í byrjunarliði Madrídarliðsins síðan hann kom til félagsins árið 2017 eftir að hafa gert garðinn frægan með Real Betis og Carlo Ancelotti, núverandi stjóri liðsins, virðist ekki meta hann að verðleikum.

Roma situr í 4. sæti ítölsku úrvalsdeildarinnar og hefur aðeins unnið tvo af síðustu fimm leikjum sínum í deildinni. Roma tapaði þar að auki 6-1 fyrir norska meisturunum Bodö/Glimt í Sambandsdeildinni á fimmtudag.

Mourinho gagnrýndi harðlega leikmenn sína eftir leikinn. „Hver einasti leikur veldur skaða. Ég ræddi við leikmennina og var hreinskilinn. Ég var hreinskilinn við þá, ég get ekki verið hreinskilinn við þig,“ sagði hann eftir leik.

„Ég hef aldrei farið leynt með það að leikmannahópurinn búi við ákveðnar takmarkanir. Við höfum 13 leikmenn sem spila fyrir eitt lið, hinir standa fyrir utan. Það eina jákvæða við þetta er að nú mun enginn spyrja mig hvers vegna ég noti alltaf sömu leikmennina.“

Mourinho hefur þegar fengið Tammy Abraham, Rui Patricio, Matias Vina, Eldor Shomurodov, Roger Ibanez og Bryan Reynolds til Roma.