Leikmaður í ensku úrvalsdeildinni og eiginkona hans urðu fyrir hræðilegri lífsreynslu á dögunum er brotist var inn til þeirra í síðasta landsleikjahléi er hann var heima með konunni sinni. Málið hefur vakið óhug í Bretlandi.

Leikmaðurinn, sem hefur ekki enn verið nafngreindur, dró sig óvænt út úr landsliðsverkefni í þessum landsleikjaglugga og héldu þjófarnir að húsið væri autt.

Hópur grímuklæddra manna ruddist inn í glæsihýsi leikmannsins með því að brjóta niður hurðina með sveðjum á meðan hann horfði á fótboltaleik í sjónvarpinu. Leikmaðurinn og kona hans voru tekin og bundin niður á meðan ræningjarnir létu greipar sópa segir í frétt The Sun.

Mennirnir tóku skartgripi og rafmagnstæki með sér á brott. Í yfirlýsingu frá lögreglunni segir að málið sé í rannsókn.

Enski boltinn á 433 er í boði