Dagný Brynjarsdóttir, leikmaður íslenska kvennalandsliðsins og West Ham, býst við erfiðum leik á morgun er íslenska liðið tekur á móti Tékklandi í undankeppni Heimsmeistaramótsins.
Íslenska liðið hefur áður spilað við það tékkneska og veit svona nokkurn veginn við hvernig leik er að búast á morgun.
„Við spiluðum við þær úti árið 2017. Það var erfiður leikur, hörkuleikur og færi á báða bóga. Við reiknum með því líka á morgun.“ Ég held að þetta verði physical leikur. Við erum fastar fyrir og látum finna fyrir okkur en te´kakarnir eru alveg eins, þetta verður hörku leikur,“ sagði Dagný Brynjarsdóttir, leikmaður íslenska liðsins.
Dagný segir leikinn á morgun mjög mikilvægan í ljósi þess að liðið ætli sér að komast á Heimsmeistaramótið.
,,Hann er ótrúlega mikilvægur. Annar leikurinn og við ekki enn komin með stig og tékkarnir komnir með fjögur stig. Auðvitað getur margt skeð hvernig sem hann fer en auðvitað ætlum við að fara í leikinn með það að markmiði að taka þrjú stig. Við ætlum okkur á HM og hvert stig skiptir máli í þeirri baráttu. Ef við ætlum að eiga séns á efsta sæti riðilsins þá verðum við að taka þrjú stig á morgun,“ sagði Dagný.
Dagný spilar úti í Englandi með félagsliði sínu West Ham United. Hún segir umgjörðina í kringum liðið mjög gott og að hún sé í umhverfi sem geri sér kleift að bæta sig sem knattspyrnukonu.
,,Ég fíla mig mjög vel þarna úti. Það er flott umgjörð í kringum liðið og liðið er mjög gott. Tímabilið hefur farið vel af stað en við höfum verið að tapa stigum í leikjum sem við hefðum átt að taka þrjú stig úr. Annars er þetta skemmtilegt og fyrst og fremst umhverfi sem ég finn að ég geti bætt mig í,“ sagði Dagný Brynjarsdóttir, leikmaður íslenska landsliðsins og West Ham.
Leikur Íslands og Tékklands fer fram á Laugardalsvelli á morgun og hefst klukkan 18:45.