Mohamed Salah er áfram á óskalista franska stórliðsins Paris Saint-Germain. Le10Sport í Frakklandi segir frá þessu.
Þessi 29 ára gamli Egypti á enn eftir að skrifa undir nýjan samning við Liverpool. Núgildandi samningur hans rennur út þarnæsta sumar.
Fréttir bárust af því um helgina að umboðsmaður Salah hefði flogið til Englands til þess að reyna að kreista fram risasamning fyrir leikmanninn. Samning sem myndi innihalda um 500 þúsund pund í vikulaun.
Á sama tíma á PSG í hættu á að missa Kylian Mbappe frítt frá sér næsta sumar. Þá rennur samningur leikmannsins út.
Hinn 22 ára gamli Mbappe virðist ekki ætla að skrifa undir nýjan samning í París. Real Madrid er talinn líklegasti áfangastaður hans.
Spænska félagið bauð 189 milljónir punda í Mbappe í sumar. Því var hafnað af PSG þrátt fyrir samningsstöðu leikmannsins.
PSG gæti séð Salah sem fullkominn arftaka Mbappe, missi þeir hann frá sér.