Lucas Hernandez, leikmaður Bayern Munchen, hefur verið dæmdur í sex mánaða fangelsi á Spáni fyrir að brjóta nálgunarbann gegn eiginkonu sinni.
Þetta hefur vakið ansi mikla athygli um heim allan en málið hófst árið 2017 er Hernandez reifst við kærustu sína á Spáni úti á götu. Eftir rifrildið var kærasta hans flutt á sjúkrahús vegna áverka. Dómstóll á Spáni gaf út nálgunarbann á þau bæði og Hernandez var kærður fyrir heimilisofbendi en hvorugt þeirra lagði fram kæru.
Þau giftu sig stuttu síðar og með því brutu þau nálgunarbannið og hefur Hernandez verið dæmdur í 6 mánaða fangelsi en kona hans þarf að sinna samfélagsþjónustu fyrir sinn þátt. Knattspyrnumaðurinn hefur ítrekað reynt að áfrýja málinu en það hefur ekki gengið eftir.
Hernandez þarf að mæta í dómsalinn 19. október og þá hefur hann 10 daga til þess að gefa sig fram og hefja fangelsisvistina.