Fjallað er um magnaða sögu Hannesar Þórs Halldórssonar á vefsíðu BBC í dag. Ferill Hannesar er ekki hefðbundinn ef litið er á feril knattspyrnumanns, Hannes lagði skóna á hilluna fljótlega eftir að hann varð tvítugur en tók þá síðan af hillunni, byrjaði að æfa og keppa og spilaði síðan nokkrum árum seinna sinn fyrsta A-landsleik 28 ára.
„Þetta væri lélegt handrit að kvikmynd. Það myndi enginn trúa þessu,“ segir Hannes um knattspyrnuferil sinn.
Það stefndi allt í að Hannes myndi snúa sér að allt öðrum hlutum en knattspyrnu. Hann meiddist illa á öxl í kringum tvítugsaldurinn, hætti í fótbolta og fór að einbeita sér að kvikmyndagerð.
Hannes fékk síðan símtal frá gömlum þjálfara sínum sem sannfærði hann um að taka slaginn með Leikni Reykjavík sem voru þá í 2. deild.
„Ég ákvað að kýla á þetta og sjá hvor atvinnuvegurinn myndi koma mér lengra,“ sagði Hannes í samtali við BBC.
Knattspyrnuferillinn fór að rúlla áfram. Hannes spilaði með Leikni R, Aftureldingu, Stjörnunni, Fram og KR áður en hann hélt út í atvinnumennsku og gerði samning við norska liðið Sandnes Ulf árið 2014. Í millitíðinni vann hann sér inn sæti í landsliði Íslands og það reyndist erfitt fyrir hann að sinna bæði kvikmyndagerðinni og knattspyrnunni.
„Árið 2013 fór ég að brenna út, það var ekki eðlilegt að vera markmaður númer eitt hjá landsliðinu og vera sífellt að vinna í öðrum hlutum með því. Þegar að ég gerðist atvinnumaður í knattspyrnu árið 2014 lagði ég með glöðu geði kvikmyndagerðina til hliðar. Ég spilaði erlendis í fimm eða sex ár og hef alið upp börnin mín í nokkrum löndum,“ sagði Hannes í samtali við BBC.
Hannes spilaði með liðum í Noregi, Hollandi, Dannmörku og Azerbaijan á sínum atvinnumannaferli áður en hann sneri aftur heim og spilaði með Val.
Heimkoman úr atvinnumennsku gerði honum kleift að setja sífellt meiri áherslu á kvikmyndagerð og afrakstur síðustu ára má sjá fljótlega í kvikmyndahúsum en það er gamanmyndin Leynilöggan.
„Þetta er gamanmynd sem er gerð af fólki sem vildi gera spennumynd,“ það er þannig sem Hannes lýsir leynilöggunni.
Hannes spilaði 77 A-landsleiki á sínum ferli. Við vitum öll hvernig sú saga fór en Hannes var hluti af landsliði sem tryggði sig inn á stórmót í fyrsta skipti, bæði á Evrópumót og Heimsmeistaramót. Hann var hluti af liðinu sem lagði England af velli í 16-liða úrslitum EM og varði víti frá Lionel Messi á HM.
„Þessar stundir eru hápunktarnir á mínum ferli og í mínu lífi. Maður á alltaf að segja að fæðing barnanna sé hápunkturinn á sínu lífi en ég myndi jafnvel segja að þessar stundir með landsliðinu toppi það, en ekki segja neinum frá því,“ sagði Hannes í viðtali við BBC.
Hannes og Kári Árnason voru í gær, fyrir leik Íslands og Leichtenstein, heiðraðir fyrir feril sinn með íslenska karlalandsliðinu.