Miklar umræður eru nú uppi um það hver verði næsti knattspyrnustjóri enska félagsins Newcastle United. Talið er næsta víst að Steve Bruce, núverandi knattspyrnustjóri liðsins verði rekinn í kjölfar þess að opinber fjárfestingasjóður Sádí Arabíu keypti Newcastle United á dögunum fyrir um 300 milljónir punda og fara á í mikla uppbyggingu.
Í frétt á DailyMail í dag er farið yfir þá kandídata sem eru taldir líklegastir til þess að taka við keflinu.
Fyrstur á lista er hinn svissneski Lucien Favre, hann hefur verið án starfs síðan að honum var sagt upp störfum hjá þýska liðinu Borussia Dortmund. Favre náði ágætis árangri á sínum tíma með Dortmund og talið er að hann sé tilbúinn til þess að taka við nýju liði.
Brendan Rodgers, knattspyrnustjóri Leicester er einnig talinn líklegur til þess að taka við Newcastle. Rodgers hefur náð góðum árangri hjá Leicester og þar áður hjá Celtic. Þá var hann nálægt því á sínum tíma að gera Liverpool að enskum meistara árið 2014.
Talandi um Liverpool, þá er fyrrverandi fyrirliði liðsins, Steven Gerrard, sem nú er knattspyrnustjóri Rangers einnig talinn eiga möguleika á því að stýra Newcastle United. Gerrard hefur átt góðu gengi að fagna með Rangers, hann gerði liðið að skoskum meistara á síðasta tímabili og gæti farið að hugsa sér til hreyfings.
Eddie Howe er án starfs eftir að hafa unnið gott starf hjá Bournemouth sem skilaði liðinu í ensku úrvalsdeildina þar sem liðið náði að festa sæti sitt í nokkur tímabil.
Roberto Martinez, landsliðsþjálfari Belgíu er einnig orðaður við stjórastöðuna á St. James’ Park. Martinez hefur reynslu úr ensku úrvalsdeildinni eftir að hafa verið knattspyrnustjóri Wigan og Everton en hann hefur frá árinu 2016 verið landsliðsþjálfari Belgíu og gæti farið að hugsa sér til hreyfings.
Stærsta nafnið á listanum er án efa Antonio Conte sem hefur verið án starfs eftir að hann hætti hjá Inter Milan eftir að hafa stýrt liðinu til sigurs í ítölsku úrvalsdeildinni á síðasta tímabili. Conte hefur einnig reynslu af því að þjálfa í Englandi og vinna ensku úrvalsdeildina. Þá hefur hann einnig reynslu úr Evrópukeppnum sem hlýtur að vera markmiðið á endanum að koma Newcastle United í.
Þá er nafn Graham Potter einnig nefnt til sögunnar en hann hefur átt góðu gengi að fagna í Englandi með Brighton og þar áður Swansea City.
Enski boltinn á 433 er í boði 
