,,Ég held að við getum ekki beðið um meira. Það var góður stuðningur, fjögur mörk, ,,clean sheet.“ Við förum sáttir á koddann í kvöld,“ sagði Albert Guðmundsson við RÚV eftir 4-0 sigur á Liechtenstein í undankeppni HM 2022 í kvöld.
Albert skoraði sín fyrstu tvö mörk í keppnisleik fyrir íslenska A-landsliðið í kvöld. Bæði komu þau af vítapunktinum.
,,Það var kærkomið. Allir sókndjarfir leikmenn lifa svolítið á mörkum og það gerir margt fyrir mig sérstaklega að skora mörk,“ sagði Albert.
Albert er ánægður með þann nýja kjarna sem er að myndast í liðinu.
,,Mér finnst við vera allir að róa í sömu átt. Það er bara jákvætt held ég að spila á mörgum leikmönnum. Gott fyrir alla að kynnast.“
,,Mér finnst mjög fínt ,,vibe“ hérna. Ekki að það hafi verið slæmt fyrir. En aðeins yngra og ferskara samt. Auðvitað vantar fullt af gæða leikmönnum sem hjálpa liðinu en það kemur alltaf maður í manns stað.“