Son Heung-Min leikmaður Tottenham fær mikið aðhald frá fjölskyldu sinni en sem dæmi hefur faðir hans bannað honum að gifta sig þangað til ferill hans er á enda. Hann telur að það trufli hann að eiga unnustu á meðan fótboltaferill hans er í gangi.
Son er einn allra besti leikmaður enska fótboltans í dag en hann er að gera heimildarmynd með Amazon sem kemur út von bráðar.
Son Heung-yun er yngri bróðir kappans en hann kemur fyrir í myndinni. Þeir bræður eru að ræða saman um úrslitaleik Meistaradeildarinnar árið 2018 þegar Tottenham tapaði fyrir Liverpool.
„Hann spilaði í úrslitum Meistaradeildarinnar,“ sagði fréttamaðurinn við Son Heung-yun. „Já hann gerði það en hann tapaði,“ sagði yngri bróðirinn.
Son Heung-Min hafði gaman af þessari pillu. „Svona er bræðralag, við erum harðir við hvorn annan,“ sagði þessi magnaði knattspyrnumaður frá Suður-Kóreu.