Breiðablik reynir að kaupa Davíð Örn Atlason bakvörð Víkinga. Þetta kom fram í hlaðvarpsþættinum, Dr. Football í dag.
Davíð hefur verið jafn besti leikmaður Víkinga síðustu ár, Kristján Óli Sigurðsson segir að það væru skynsamlegri kaup að taka Davíð frekar en Jonathan Hendricx sem hefur verið orðaður við félagið.
„Fyrir mér yrðu þetta skynsamlegri kaup en að taka krabbameinið hann Jonathan Hendricx, hann býr til eitraða stemmingu hvert sem hann fer,“ sagði Kristján Óli.
Kristján Óli kvaðst vera með það staðfest að viðræður ættu sér stað. „Á föstudag í síðasta lagi, verður búið að henda bleki á blað.“
Kristján Óli greindi svo frá því að Breiðablik væri að skoða að selja sinn besta sóknarmann, Thomas Mikkelsen. Hann væri dýr kostur og KA hefði áhuga á að kaupa hann.
„KA menn hafa áhuga, hann er dýr og mér skilst að það sé verið að velta steinum hvort þetta sé hagur fyrir félagið að losa þessa fjármuni. Hann sagði sjálfur í frægu viðtali í Danmörku að hann væri að mala gull á Íslandi.“