Neil Lennon, knattspyrnustjóri skoska liðsins Celtic skilur ekkert í þeirri gagnrýni sem félagið hefur fengið á sig eftir að hafa ferðast til Dubai á miðju tímabili í Skotlandi og neitar að biðjast afsökunar á ferðinni.
Gagnrýnin fólst í því að félagið væri að taka óþarfa áhættu í miðjum heimsfaraldri með því að ferðast til Dubai og hafi þar með hundsað uppgang faraldursins heimavið. Myndir sem birtust af leikmönnum og starfsliði félagsins með bjór á sundlaugarbakka í Dubai á meðan skoskir landsmenn sættu útgöngubanni, sefuðu ekki gagnrýnina.
Lennon segir að sitt lið þurfi að sitja undir einelti og að allt fjaðrafokið sé drifið áfram af pólitískum ástæðum.
Tveir leikmenn Celtic hafa greinst með Covid-19 í kjölfarið og þurfti Lennon ásamt 13 leikmönnum Celtic að fara í sóttkví sem varð til þess að þeir leikmenn gátu ekki tekið þátt í tveimur leikjum liðsins sem enduðu báðir með jafntefli.
Framkvæmdastjóri Celtic, hefur beðið stuðningsmenn liðsins afsökunar og sagði að ferðin hafi verið mistök. Lennon neitar hins vegar að biðjast afsökunar á ferðinni.
„Ég bið stuðningsmenn okkar bara afsökunar á því að 13 leikmenn þurftu að fara í sóttkví í 10 daga, sem er fáránlegt. Ég biðst ekki afsökunar á öðru,“ sagði Neil Lennon, knattspyrnustjóri Celtic á blaðamannafundi.
Celtic situr í 2. sæti skosku úrvalsdeildarinnar, 21 stigi á eftir toppliði Rangers. Celtic á þó þrjá leiki inni á Rangers en þrátt fyrir það er forysta Rangers mikil.