Gary Neville var allt annað en sáttur eftir að Bruno Fernandes baðst afsökunar á samfélagsmiðlum fyrir að hafa klúðrað vítaspyrnu fyrir Man Utd gegn Aston Villa á laugardag.

United var 1-0 undir í leiknum þegar að liðið fékk vítaspyrnu í uppbótartíma. Bruno Fernandes fór á punktinn og skaut hátt yfir markið og United þurfti að sætta sig við fyrsta tap liðsins í deildinni á tímabilinu. Bruno birti langa stöðuuppfærslu þar sem hann baðst afsökunar en sagði jafnframt að hann yrði reiðubúinn að taka næstu vítaspyrnu liðsins.

Neville var á því að færslan skorti alla einlægni og að hún væri einfaldleg samin af almannatengli.

Aðspurður á Twitter hvort leikmenn ættu að biðjast afsökunar fyrir að klikka á vítaspyrnum sagði United goðsögnin að það væri „skammarlegt!“.

„Þeir þurfa að reka almannatenglana sína, tala af einhverri einlægni og vinna sína vinnu. Ég ætla að hafa háttt um þetta á næstu vikum. Þeir eru með alla þessa samskiptastjóra. Þeir eru að búa til persónuleika sem eru ekki til!“ sagði Neville.

Gagnrýni Neville kemur eftir að Phil Foden rak almannatengslateymi sitt fyrr á árinu. City maðurinn var óánægður með teymið eftir að það birti tíst sem gagnrýndi Kylian Mbappe, framherja PSG fyrir leik í Meistaradeildinni.

„Ég minntist á þetta fyrir nokkrum vikum síðan að aðgangar séu reknir af samfélagsmiðla fyrirtækjum. Strákarnir þurfa að stjórna aðgöngunum sínum sjálfir! Þín sjálfstæða hugsun og einlægni er í húfi. Þetta er þín rödd, ekki annarra.“