Tracey Crouch, þingmaður breska íhaldsflokksins, leggur til að áhorfendum á knattspyrnuleikjum á Bretlandi verði á ný leyft að neyta áfengis í sætum sínum.

Tilraun verður gerð á þessu á næstunni. Fyrst um sinn verður áhorfendum á leikjum í ensku D -og E-deildinni leyft að hafa áfengi um hönd í sætum sínum. Gangi það síðan vel verður það leyft um öðrum deildum, til að mynda ensku úrvalsdeildinni. Þetta segir í frétt Times. 

Áhorfendum á Bretlandi hefur verið meinað að neyta áfengis í sætum sínum á knattspyrnuleikjum síðan 1985. Bannið var upphaflega sett á til að koma í veg fyrir óeirðir á meðal stuðningsmanna.

Crouch segir að vegna bannsins eigi stuðninsgmenn það til að drekka hratt og vel fyrir leik og í hálfleik, heilbrigðara sé að fá einfaldlega að hafa áfengið með sér í stúkunni.