Vanda Sigurgeirsdóttir hefur ákveðið að bjóða sig fram til formanns KSÍ í febrúar þegar nýr formaður veðrur kjörinn.

Guðni Bergsson sagði af sér sem formaður eftir að sambandið var sakað um að hylma yfir meint kynferðisbrot landsliðsmanna. Stjórnin sagði af sér degi síðar.

Bráðabirgðarstjórn mun taka við hjá KSÍ í næsta mánuði en ný stjórn og formaður verður svo kjörinn á næsta ársþingi í febrúar.

„ Ég hef fengið fjölda áskorana frá fjölskyldu og vinum, frá fjölbreyttum hópi fólks í samfélaginu og úr knattspyrnuhreyfingunni sjálfri. Ég er mjög þakklát fyrir þessa hvatningu. Þetta var ekki einföld ákörðun en af vandlega íhuguðu máli ákvað ég bjóða mig fram,“ skrifar Vanda í yfirlýsingu á Facebook.

Vanda átti farsælan feril sem knattspyrnukona, bæði með félagsliði og landsliði.

Yfirlýsing Vöndu:
Ég hef ákveðið að bjóða mig fram til formanns Knattspyrnusambands Íslands. Ég hef fengið fjölda áskorana frá fjölskyldu og vinum, frá fjölbreyttum hópi fólks í samfélaginu og úr knattspyrnuhreyfingunni sjálfri. Ég er mjög þakklát fyrir þessa hvatningu. Þetta var ekki einföld ákörðun en af vandlega íhuguðu máli ákvað ég bjóða mig fram. Mér þykir vænt um þessa hreyfingu og hef verið partur af henni stóran hluta ævi minnar. Ég tel að ég sé vel til þess fallinn að leiða þá vinnu sem framundan er.