Möguleiki er á að Þorlákur Árnason komi aftur heim í þjálfun en hann skoðar nú möguleika sína. Þetta staðfesti hann í samtali við 433.is í gærkvöldi.
Samkvæmt heimildum 433.is er Þorlákur væntanlegur til Akureyrar í dag þar sem hann ætlar að ræða við forráðamenn Þórs. Orri Freyr Hjaltalín var rekinn úr starfi undir lok tímabilsins í Lengjudeildinni.
„Ég er að skoða nokkra möguleika hérna heima, get staðfest það,“ sagði Þorlákur í samtali við 433.is í gær.
Þór endaði í tíunda sæti Lengjudeildarinnar í sumar en liðið er með nokkuð góðan efnivið, bundnar eru vonir við að ungir leikmenn fái stærra hlutverk á næstu leiktíð.
Þorlákur hefur á síðustu árum verið yfirmaður knattspyrnumála hjá knattspyrnusambandi Hong Kong. Hann skoðar nú kosti sína hér heima en Þorlákur hefur mikla reynslu úr þjálfun.
Þorlákur var farsæll sem þjálfari kvennaliðs Stjörnunnar en einnig hefur hann stýrt Val og Fylki í karlaflokki.