Fjárhagsvandræði Barcelona gætu versnað á komandi vikum þar sem Barcelona þarf að greiða Liverpool 17 milljónir punda fyrir kaupin á Philippe Coutinho í janúar 2018.
Brasilíski miðjumaðurinn nálgast 100 leiki fyrir Barcelona og samkvæmt frétt Daily Star og Sport.es segir að þegar leikmaðurinn nái þeim leikjafjölda þurfi spænska félagið að greiða Liverpool 17 milljónir punda.
Barcelona hefur verið í miklum fjárhagsvandræðum upp á síðkastið og þurft að losa sig við ýmsa leikmenn. Félagið gat til að mynda ekki haldið stórstjörnunni Lionel Messi hjá félaginu en hann hafði leikið allan sinn feril með Barcelona.
Coutinho hefur nú leikið 90 leiki fyrir Barcelona og gæti náð leik númer 100 er liðið mætir Rayo Vallecano 27. október. Coutinho hefur skorað 23 mörk í þessum 90 leikjum fyrir Barcelona.
