Cristiano Ronaldo hefur samið um kaup og kjör við Manchester City, Jorge Mendes umboðsmaður hans reynir nú að losa hann frá Juventus. AS á Spáni segir frá.
Ronaldo vill fara frá Juventus áður en félagaskiptaglugginn lokar í næstu viku, samtalið milli City og Juventus er ekki hafið. Juventus vill 30 milljónir evra fyrir Ronaldo.
City er tilbúið að gera tveggja ára samning við Ronaldo en ljóst er að hann myndi lækka verulega í launum.
Ronaldo er goðsögn í augum stuðningsmanna Manchester United, ljóst er að þeir ættu erfitt með að fyrirgefa honum það að taka skrefið yfir til CIty.
Ronaldo ræddi áhuga Manchester City á sér árið 2015, þá sex árum eftir að hann fór frá United. „Heldur þú að peningar breyti hugsunum mínum þegar ég er þrítugur? Ég held ekki, það er ekki vandamálið mitt,“ sagði Ronaldo.
„Ef þú talar um peninga þá get ég eflaust farið til Katar, þeir eiga eflaust meiri pening en Manchester City. Þetta snýst ekki um peninga heldur ástríðu.“
