Arnar Þór Viðarsson hefur opinberað landsliðshóp sinn fyrir komandi verkefni í undankeppni HM 2022. Hópurinn sem opinberaður var í dag er áhugaverður.

Liðið mætir Rúmeníu, Norður-Makedóníu og Þýskalandi í þremur heimaleikjum en fyrsti leikur er á fimmtudag í næstu viku.

Flestum Íslendingum er kunnugt um stöðu Gylfa Þórs Sigurðssonar, þessi besti knattspyrnumaður Íslands síðustu ár var handtekinn í júlí vegna gruns um um brot gegn barni. Gylfi Þór er laus gegn tryggingu fram í október en rannsókn lögreglu er í gangi.

Arnar Þór var spurður út í málefni Gylfa Þórs en gat lítið sagt. „Gylfi er ekki valinn og ég hef ekki haft samband við Gylfa. Meira get ég ekki sagt um það mál ,“ sagði Arnar Þór á fréttamannafundi sínum í dag.

Snorri Másson fréttamaður á Stöð2 reyndi að fá svör frá Arnari um málið en Arnar vildi ekki tjá sig um málið.

„Hér í dag erum við að ræða landsliðshóp fyrir næstu þrjá heimaleiki, allt sem kemur að liðinu og hópnum. Það er það eina sem við viljum ræða, hversu spennandi verkefni þetta er fyrir okkur. Hversu spennandi það verkefni er fyrir okkar ungu leikmenn, þjálfarar vilja alltaf velja sitt besta lið. Við stjórnum ekki alltaf því hverja við getum valið.“

Gylfi hefur verið einn besti leikmaður Íslands síðustu árin og átt stóran þátt í mikilli velgengni félagsins.

„Við veljum þann hóp sem stendur okkur til boða, oft viljum við fá aðra leikmenn en við erum að velja. EF það væri bannað að velja ákveðan leikmenn þá þyrftum við að fylgja þeim fyrirmælum frá okkar yfirmönnum.“