ÍBV vann heimasigur á Aftureldingu í Lengjudeild karla í dag. Leikurinn var liður í 14. umferð.

Gestirnir komu sér í erfiða stöðu strax á 8. mínútu þegar Oskar Wasilewski fékk rautt spjald fyrir ljóta tæklingur á Breka Ómarssyni.

Það var svo Breki sem kom Eyjamönnum yfir um miðjan fyrri hálfleik með glæsilegu marki.

Seku Conneh innsiglaði svo 2-0 sigur ÍBV með marki í blálokin.

Það vakti athygli að Bjarni Ólafur Eiríksson var á varamannabekk ÍBV í leiknum. Hann kom inn á þegar korter var eftir. Bjarni fór frá liðinu eftir síðustu leiktíð. Hann er þó enn skráður í félagið og var mættur í dag.

ÍBV er í öðru sæti deildarinnar með 29 stig. Þeir eru með 6 stiga forskot á Fjölni og 7 stiga forskot á Kórdrengi. Síðarnefnda liðið á þó tvo leiki til góða.

Afturelding er í níunda sæti með 16 stig.